बिबट्याच्या वावराने विडणीत घबराट : कालवड फस्त

फलटण प्रतिनिधी :- मौजे विडणी येथे २४ फाटा राऊतवस्ती येथील गोठ्यातील चार महिन्यांची कालवड बिवट्याने ऊसात ओढत नेऊन फस्त केल्याची घटना घडली आहे. विडणी भागातील नागरिकांमध्ये घबराट निर्माण झाली आहे.

घटनास्थळी मिळालेल्या माहितीनुसार, मौजे विडणी येथे काल बुधवार दिनांक २१ रोजी रात्री ११.३० वाजण्याच्या सुमारास २४ फाटा राऊतवस्ती येथील संतोष रामचंद्र नाळे यांच्या गोठ्यातील चार महिन्यांची कालवड बिवट्याने ऊसात ओढत नेऊन फस्त केल्याची घटना घडली आहे. या घटनेची माहिती मिळताच फलटण वनअधिकारी सारिका लवांडे, राजेंद्र कुंभार यांनी घटनास्थळी जाऊन तत्काळ पंचनामा केला असून घटनेच्या ठिकाणी शेतामध्ये बिबट्याचे ठसे आढळून आले आहेत,या बिबट्याने संतोष नाळे यांच्या गुरांच्या गोठ्यापासून सुमारे एक किलोमीटर अंतरावर ही कालवड ओढून ऊसात नेवून टाकल्याचे आढळून आले आहे. फलटण तालुक्यात विडणी परिसर हा संपूर्ण बागायती क्षेत्र म्हणून ओळखला जातो. या घटनेमुळे शेतकरी वर्गांमध्येही भीतीचे वातावरण निर्माण झाले आहे. 

बिबट्या हा एक अत्यंत लाजाळू प्राणी आहे, त्याला लोकांपासून दूरच रहायला आवडतं. लोकांचा आवाज आला तर बिबटे दूर पळून जातात बिबटे एकटं राहणंच पसंद करतात. फक्त विणीच्या काळातच बिबटे समूहात आढळून येतात. मादी बिबट्या किमान एक वर्ष पिल्लांची काळजी घेते. बिबटे जंगलात खडकाळ गुहेसारख्या भागात राहतात. बिबटे बहुतांशवेळा हरीण, सांबर आणि रानडुकरांची शिकार करतात. बिबट्यांच्या शरीरावचे डाग एकसारखेच दिसत असले तरी दोन बिबट्यांच्या शरीरावर कधीच एकसारखे डाग दिसत नाहीत. 

प्रत्येक बिबट्या वेगळा असतो आणि त्यांच्या शरीरावरील डिजाईन वेगवेगळं असतं.बिबट्यांचा अधिवास नष्ट झाल्याने आणि पाण्याच्या कमतरतेमुळे बिबटे मानवी वस्तीत घुसत आहेत.बिबट्या दिसल्यास त्याच्या जवळ जाऊ नये तसेच त्याचा पाठलागही करू नये, अंधारात मुलांना एकटे सोडू नये, बिबट्याला पुरेसे खाद्य व राहण्यायोग्य वातावरण मिळाले तर बिबट्या गावाजवळ राहू शकतो, पाळीव कुत्रे बकऱ्या व डुकरे बिबट्याला वस्तीकडे आकर्षित करतात, शेतकऱ्यांनी स्वतःचे नुकसान कमी करण्यासाठी आपल्या गुरांना बंदिस्त गोठ्यामध्ये ठेवणे आवश्यक आहे अशा गोष्टी नागरिकांनी कराव्यात असे आवाहन वन विभागाच्यावतीने करण्यात आले आहे.