माउलींच्या स्वागतासाठी फलटणला पूर्वतयारी सुरु : मुख्याधिकारी निखिल मोरे

फलटण प्रतिनिधी - २६ जून २०२५

 संतश्रेष्ठ ज्ञानेश्वर महाराज यांच्या पालखी आगमनाच्या पार्श्वभूमीवर फलटण पालिकेकडून रस्ते, आरोग्य, पाणीपुरवठा अशा सुविधांबाबतीत पूर्वतयारी सुरु असल्याची माहिती मुख्याधिकारी निखिल मोरे यांनी दिली.

पालखी सोहळा शनिवारी दि. २८ जून रोजी फलटण मुक्कामी येत आहे. या पार्श्वभूमीवर फलटण नगरपालिकेमार्फत सुरु असलेली आणि झालेली कामे याबाबत मुख्याधिकारी मोरे यांनी सांगितले, "फलटण शहरातील रस्त्यांच्या डांबरीकरणाबाबत सार्वजनिक बांधकाम विभागाकडे तसेच भारतीय राष्ट्रीय राजमार्ग प्राधिकरणाकडे पालिकेकडून पाठपुरावा करण्यात आला असून वेळोवेळी झालेल्या पावसाच्या अडथळ्यातून पालखी मार्गाची आणि वाहतुकीच्या मार्गाची तात्पुरती डागडुजी पूर्ण होत आलेली आहे.

शहरातील पुलांचे नुकत्याच झालेल्या अतिवृष्टीमुळे तुटलेले रेलिंग तातडीने बसवण्यात आले असून नदीपुलावरून चालताना वारकऱ्यांना कोणताही धोका होणार नसल्याची दक्षता घेतली आहे. पालखी मार्गावरील दगड माती उचलण्याचे आणि स्वच्छता करण्याचे काम युद्धपातळीवर सुरु असून यासाठी स्वतंत्र टीम नेमण्यात आली असल्याचे मुख्याधिकारी निखिल मोरे यांनी सांगितले.

वारकऱ्यांसाठी शहरातील प्रत्येक प्रमुख चौकात एक पाणपोई ठेवण्यात येणार आहे. वारकऱ्यांचे पाण्याचे टँकर भरण्यासाठी पालिकेच्या पाणीपुरवठा केंद्रावर कायमस्वरूपी सुविधा उपलब्ध देण्यात आली आहे, याठिकाणी एकाच वेळी ८ पाणी टँकर भरू शकतील अशी व्यवस्था असून १० हजार लिटरचा एक

टैंकर ७ ते ८ मिनिटांमध्ये भरून होईल, असे मुख्याधिकारी निखिल मोरे यांनी नमूद केले. वाहतुकीचे नियोजन करण्यासाठी वारकऱ्यांच्या माल वाहतूक ट्रक व अन्य वाहनांसाठी विशेष मार्गाची आखणी केली जात आहे, असेही मोरे यांनी सांगितले.

पालखी तळावर पावसामुळे अडचण निर्माण होऊ नये यासाठी मुख्य रस्ता डांबरीकरण करण्यात आला असून साईडपट्टी मुरुमाने भरण्यात आल्या आहेत. दोन जेसीबी आणि दोन ट्रॅक्टर तसेच ५०

पालखी तळावर तात्पुरता दवाखाना

यावर्षी प्रथमच जर्मन मंडपाच्या माध्यमातून वारकरी सेवा केंद्र यशवंतराव चव्हाण कॉलेज याठिकाणी उभे करण्यात आले असून १५० डॉक्टरांच्या सहाय्याने या ठिकाणी वारकरी सेवा करण्यात येणार आहे. शासनाच्यावतीने हे केंद्र उभे झाले आहे. याठिकाणी महिला आणि पुरुष वारकरी यांच्यासाठी स्नानगृहाच्या उभारणीचे काम युद्धपातळीवर सुरु आहे. पालखी तळ तेथे कोणत्याही प्रकारचे हातगाडे, हॉटेल लागणार नाहीत आणि पालखी आगमनाच्या वेळी गर्दी होणार नाही यासाठी नगरपालिकेचे फिरते पथक तैनात असून पोलीस विभागाची मदत यासाठी घेण्यात येत आहे. पालखी तळावर आरोग्य विभागामार्फत छोटे तात्पुरते हॉस्पिटल आणि दवाखाना तयार करण्यात येत असून या ठिकाणी हिरकणी कक्ष आणि वारकऱ्यांच्या सेवेसाठी २० फिजिओथेरपीचे डॉक्टर्स तैनात असणार आहेत.

कर्मचाऱ्यांच्या मदतीने पालखी तळाची स्वच्छता अंतिम टप्प्यामध्ये आहे. पालखी तळावरील विद्युत रोषणाई लाईटसाठी ८ सॅटेलाईट पॉईंट, छोट्या मोठ्या जनरेटरची सुविधा उपलब्ध करून देण्यात आली आहे. पालखी तळावरील दर्शन बारीची व्यवस्था पूर्ण झाली आहे. पालखी तळावर तात्पुरत्या शौचालयाची, स्नानगृहाची सुविधा व त्याठिकाणी लाईटची सुविधा देण्यात येणार आहे, असेही सांगून वारकऱ्यांची फलटण शहरात गैरसोय होणार नाही यासाठी फलटण पालिका सर्वतोपरी खबरदारी घेणार असल्याची ग्वाही निखिल मोरे यांनी दिली. पावसाचा जोर पाहता यावर्षी पालखी तळावर लाल मातीऐवजी कमी जाडीची कच टाकण्यात येणार असून पालखी सोहळा सुखकर होण्यासाठी ठिकठिकाणी बॅरिकेटिंग करण्यात येत आहे.