माढ्यातून महाविकास आघाडीचे महादेवराव जानकर ; शरद पवारांची नवी खेळी

फलटण - सचिन मोरे 

आगामी लोकसभा निवडणूकीचा बिगुल वाजला असून माढा लोकसभा मतदार संघात महायुती कडून भारतीय जनता पार्टीचे विद्यमान खासदार रणजितसिंह नाईक निंबाळकर यांना उमेदवारी जाहिर झाली आहे मात्र रणजितसिंह यांची उमेदवारी आपल्याला मान्य नसून महायुतीने रणजितसिंह यांची उमेदवारी बदलावी असे आवाहन राष्ट्रवादी काँग्रेस पक्षाचे ज्येष्ठ नेते आमदार रामराजे नाईक निंबाळकर व माजी उपमुख्यमंत्री विजयसिंह मोहिते पाटील यांनी केले आहे.

 तर दुसरीकडे महाविकास आघाडी कडून राष्ट्रवादी काँग्रेस पक्ष शरद पवार गटाकडून राष्ट्रीय समाज पक्षाचे अध्यक्ष आमदार महादेवराव जानकर यांच्या नावाची घोषणा होण्याची शक्यता वर्तवली जात आहे.

 कालच शरद पवार यांनी फलटण येथील त्यांचे निकटवर्तीय दिवंगत 

सुभाषराव शिंदे यांच्या निवासस्थानी सांत्वन पर भेट घेतली होती. तर आज माढा लोकसभा मतदारसंघातून महाविकास आघाडी कडून महादेवराव जानकर यांचे नाव चर्चिले जाऊ लागले आहे. महादेव जानकर हे परभणी लोकसभा मतदारसंघातून निवडणूक लढविण्यास इच्छुक होते मात्र शिवसेनेचे विद्यमान खासदारांना त्या ठिकाणी उमेदवारी मिळण्याची शक्यता लक्षात घेता महादेवराव जानकर यांना माढा मतदारसंघातून महाविकास आघाडी भाजपाच्या विरुद्ध मैदानात उतरवण्याच्या तयारीत असल्याचे बोलले जात आहे.

 महादेवराव जानकर हे सातारा जिल्ह्यातीलच सुपुत्र असल्याने माढा लोकसभा मतदारसंघ व त्यांचा विशेष प्रभाव नेहमीच जाणवला आहे. त्यामुळे महाविकास आघाडीची ही खेळी भाजपाच्या उमेदवाराला समर्थ पर्याय असल्याचे सध्या बोलले जात आहे.

 राष्ट्रीय समाज पक्षाच्या माध्यमातून महादेवराव जानकर यांनी फलटण, माण,सांगोला, माळशिरस, अकलूज, माढा, मोठे संघटन उभे केले आहे. तसेच शरद पवार यांना मानणारा मोठा वर्ग माढा मतदारसंघात असल्याचे बोलले जात आहे. तर दुसरीकडे महायुतीतील मोहिते पाटील घराणे व नाईक निंबाळकर घराणे दोन्ही सध्या महायुतीच्या उमेदवारावर नाराज असल्याचा फायदा महाआघाडीचे उमेदवार महादेवराव जानकर यांना होऊ शकतो असे जाणकारांचे मत आहे.