दरोड्याचा गुन्हा ४८ तासात उघडकीस

सातारा : दरोड्याचा गुन्हा ४८ तासात उघडकीस आणून पाच दरोडेखोरांना जेरबंद करण्यात स्थानिक गुन्हे शाखेच्या पथकाला यश आल्याची माहिती पोलीस अधीक्षक अजय बन्सल यांनी पत्रकार परिषदेत दिली.
सचिन रावसाहेब पवार (वय २५), सोमनाथ गोपीनाथ गायकवाड (वय २३, दोघेही रा. सदाफुलेवस्ती, जामखेड, जि. अहमदनगर), गोविंद वासुदेव घुमरे (वय २४, रा. पारगाव शिरस, ता. जि. बीड), शिवाजी महादेव अडागळे (वय ३३, सध्या रा. वनवासवाडी, ता. सातारा), दशरथ भुजंग क्षिरसागर (वय ३२, रा. प्रतापसिंह नगर, सातारा) अशी अटक केलेल्यांची नावे आहेत.
याबाबत अधिक माहिती देताना अजय बन्सल पुढे म्हणाले, दि. ८ नोव्हेंबर रोजी रात्री साडेतीन वाजण्याच्या सुमारास शेंद्रे, ता. सातारा गावच्या हद्दीत राष्ट्रीय महामार्गावर पुलाच्याखाली तीन वेगवेगळ्या दुचाकीवरून आलेल्या अनोळखी इसमांनी विनायक विजय हाके (वय ३०, रा. बोरगाव, ता. वाळवा) याची पिकअप व्हॅन थांबवून तू सोनगाव रोडला एकाला धडक देऊन आला आहेस. असे सांगत त्याच्या डोळ्यात चटणी टाकून खिशातील मोबाइल काढून घेतला. अन्य अनोळखी इसमांनी पिकअप व्हॅनच्या ड्राव्हरमध्ये ठेवलेली ५२ हजार ६८० रुपयांची रोख रक्कम जबरदस्तीने काढून घेतल्याची तक्रार सातारा तालुका पोलीस ठाण्यात दाखल झाली होती.
हा गुन्हा उघडकीस आणण्याच्या सूचना स्थानिक गुन्हे शाखेचे पोलीस निरीक्षक किशोर धुमाळ यांना देण्यात आल्या होत्या. त्यानुसार धुमाळ यांनी सहाय्यक पोलीस निरीक्षक रमेश गर्जे यांच्या अधिपत्याखाली स्थानिक गुन्हे शाखेचे पथक नेमले होते.
पथकाने घटनास्थळी पाहणी करून या गुन्ह्यातील फिर्यादी तसेच त्याच्यासोबत हजर असलेला गाडीवरील क्लिनर, इतर साक्षीदार यांच्याकडे विचारपूस केली असता पथकाला एक महत्त्वपूर्ण माहिती प्राप्त झाली. त्या अनुषंगाने सातारा शहरातील सीसीटीव्ही फुटेज तपासून गोपनीय बातमीदारांमार्फत खातरजमा केली असता हा गुन्हा सातारा शहरातील एका संशयिताने त्याच्या जामखेड, जि. अहमदनगर आणि बीड येथील साथीदारांसह केला असून संबंधित संशयित त्याच्या मूळ गावी भुम, जि. उस्मानाबाद येथे असल्याची माहिती प्राप्त झाली. मिळालेल्या माहितीच्या अनुषंगाने स्थानिक गुन्हे शाखेचे पथक भुम व बीड येथे गेले. तेथे जाऊन वरील पाच जणांना ताब्यात घेऊन विचारपूस केली असता त्यांनी हा गुन्हा केल्याची कबुली दिल्यानंतर त्यांना अटक करण्यात आली आहे. त्यांना पुढील कार्यवाही कामी सातारा तालूका पोलीस ठाण्याचे ताब्यात देण्यात आले आहे.
ही कारवाई पोलीस अधीक्षक अजयकुमार बन्सल, अपर पोलीस अधीक्षक अजित बोर्‍हाडे, सहायक पोलीस अधीक्षक श्रीमती आंचल दलाल यांच्या सुचनांप्रमाणे तसेच स्थानिक गुन्हे शाखेचे पोलीस निरीक्षक किशोर धुमाळ यांच्या मार्गदर्शनाखाली सहायक पोलीस निरीक्षक रमेश गर्जे, पोलीस उप-निरीक्षक गणेश वाघ, पोलीस उप-निरीक्षक मदन फाळके, पोलीस अंमलदार उत्तम दबडे, तानाजी माने, कांतीलाल नवघणे, विश्वनाथ संकपाळ, अतिश घाडगे, संतोष पवार, संतोष सपकाळ, संजय शिर्के, विजय कांबळे, शरद बेबले, मंगेश महाडीक, साबीर मुल्ला, नितीन गोगावले, प्रविण फडतरे, निलेश काटकर, मुनीर मुल्ला, गणेश कापरे, अर्जुन शिरतोडे, अमित सपकाळ, शिवाजी भिसे, अमोल माने, स्वप्नील माने, राजु ननावरे, विक्रम पिसाळ, विशाल पवार, रोहित निकम, प्रविण पवार, वैभव सावंत, केतन शिंदे, सचिन ससाने, संकेत निकम,मयुर देशमुख, मोहसीन मोमीन, चालक पोलीस अंमलदार संभाजी साळुंखे,गणेश कचरे, पंकज बेसके, शिवाजी गुरव यांनी केली आहे.