विजयराव बोरावके यांचे निधन : फलटणमध्ये हळहळ व्यक्त

फलटण प्रतिनिधी :

मुंबई कृषी उत्पन्न बाजार समितीचे माजी चेअरमन आणि राष्ट्रवादी काँग्रेसचे ज्येष्ठ नेते डॉ. विजयराव कोंडीराम बोरावके (वय ८३) यांचे पुण्यातील एका खासगी रुग्णालयात निधन झाले. काही दिवसांपासून प्रकृती अस्वस्थ असलेल्या बोरावके यांच्यावर उपचार सुरू होते. मात्र उपचाराला प्रतिसाद न मिळाल्याने त्यांची प्राणज्योत मालवली.

उद्योजक, सामाजिक कार्यकर्ता आणि राजकीय नेते म्हणून त्यांनी स्वतंत्र ओळख निर्माण केली होती. राष्ट्रवादी काँग्रेस पक्षामधील ज्येष्ठ मार्गदर्शक म्हणून त्यांचा सन्मानाने गौरव केला जात असे. पक्ष संघटन मजबूत करण्यापासून कृषी क्षेत्रातील उपक्रमांपर्यंत त्यांच्या मार्गदर्शनाचा अनेकांना लाभ झाला.

त्यांच्या निधनाने फलटणसह राज्यातील राजकीय व सामाजिक क्षेत्रात हळहळ व्यक्त होत आहे.

बोरावके यांच्या पार्थिवावर अंतिम संस्कार आज सोमवार दिनांक 17 नोव्हेंबर रोजी दुपारी ३ वाजता फलटण येथे करण्यात येणार आहेत.

त्यांच्या निधनाने एक शांत, सुसंस्कृत आणि मार्गदर्शक नेतृत्व हरपल्याची भावना व्यक्त केली जात आहे.