फलटण नगरपालिका निवडणूक : राजकीय ‘क्लायमॅक्स’ लवकरच – उमेदवारीवरून चर्चांना उधाण

फलटण (प्रतिनिधी) – नगरपालिका निवडणुकीचे नामनिर्देशन फॉर्म भरण्यासाठी केवळ एकच दिवस बाकी असताना राजकीय वातावरण अक्षरशः तापले आहे. उमेदवारांच्या नावांवरून सर्वच गटांमध्ये तणाव, चर्चा आणि चाचपणी सुरू असून, राजेगट आणि महायुतीचा निर्णय कोणत्याही क्षणी जाहीर होण्याची चिन्हे दिसत आहेत.

भाजपाकडून समशेरसिंह यांना उमेदवारीची जोरदार चर्चा  

माजी खासदार लोकनेते कै. हिंदुराव नाईक निंबाळकर यांचे चिरंजीव व माजी खासदार रणजितसिंह नाईक निंबाळकर यांचे जेष्ठ बंधू फलटण नगर पालिकेचे माजी विरोधी पक्ष नेते समशेरसिंह नाईक निंबाळकर यांच्या उमेदवारी बाबत भाजपामध्ये चांगलीच चर्चा रंगली आहे. शहरातील व्यापारी वर्ग, तरुण मतदार आणि मधल्या फळीतील कार्यकर्त्यांकडून त्यांना मिळणारा प्रतिसाद पाहता भाजपाकडून त्यांना अधिकृत उमेदवारी मिळण्याची शक्यता राजकीय वर्तुळात चर्चेत आहे.

गटातील काही वरिष्ठ पदाधिकाऱ्यांनी देखील याला दुजोरा दिल्याचे बोलले जात आहे. तर अनेकांनी या भूमिकेला पाठिंबा दिल्याची माहिती सूत्रांकडून समोर येत आहे. समशेरसिंह यांनी मागील काही दिवसांत शहरातील मतदार, सामाजिक संस्था आणि व्यावसायिकांशी केलेल्या भेटीगाठींमुळे त्यांची उमेदवारी जवळजवळ निश्चित असल्याच्या चर्चा रंगत आहेत.

रामराजे गटाचा पुढचा ‘मोठा’ निर्णय : अनिकेतराजे मैदानात?

दुसरीकडे, 35 वर्षे फलटणच्या राजकारणात वर्चस्व गाजवणारे विधान परिषदेचे माजी सभापती आमदार श्रीमंत रामराजे नाईक निंबाळकर आपल्या गटाचा नगराध्यक्ष उमेदवार कोण याविषयी अद्याप मौन बाळगून आहेत. तर सातारा जिल्हा परिषदेचे माजी अध्यक्ष श्रीमंत संजीवराजे नाईक निंबाळकर, कृषी उत्पन्न बाजार समितीचे सभापती श्रीमंत रघुनाथराजे नाईक निंबाळकर, माजी आमदार दिपकराव चव्हाण यांच्यावरही नगर पालिकेची सत्ता अबाधित ठेवण्यासाठी झगडावे लागणार आहे. मात्र, त्यांच्या गटातही मोठा ट्विस्ट येऊ शकतो अशी चर्चा आहे.

रामराजेंचे सुपुत्र ॲड. अनिकेतराजे यांना पुन्हा एकदा सक्रिय राजकारणात उतरवण्याचा निर्णय गटातील काही वरिष्ठांनी मांडल्याचे चर्चा आहे. कायद्याचे सखोल ज्ञान, युवकांमध्ये वाढती ओळख आणि राजेंची परंपरा या तिन्ही कारणांमुळे अनिकेतराजेंचे नाव प्रामुख्याने पुढे येत आहे. सूत्रांकडून मिळालेल्या माहितीनुसार, रामराजे यावर आज-उद्याच अंतिम निर्णय घेऊ शकतात.

दोन्ही गटांचा निर्णायक टप्पा – शहरात उत्सुकतेचं वातावरण

शहरातील जनमानसात उत्सुकता शिगेला पोहोचली आहे तर कार्यकर्त्यांमध्ये उमेदवारी निश्चितीच्या मुद्यावरून कल्लोळ सुरू आहे. अंतिम उमेदवारी जाहीर होताच फलटणचे राजकारण अजून तापण्याची चिन्हे असून, ‘समशेर विरुद्ध अनिकेत’ अशी थेट लढत रंगण्याची शक्यता राजकीय वर्तुळात रंगली आहे. माजी नगराध्यक्ष दिलीपसिंह भोसले यांचे नाव चर्चेत असले तरीही त्यांचा प्रभाव मात्र जाणवत नसल्याचे जाणकार सांगतात.

महायु्तीचे जेष्ठ नेते प्रल्हादराव साळुंखे पाटील, माजी खासदार रणजितसिंह नाईक निंबाळकर, आमदार सचिन पाटील, राष्ट्रवादी काँग्रेस अजित पवार गटाचे तालुकाध्यक्ष श्रीमंत शिवरूपराजे खर्डेकर, यांचा उमेदवारीचा निर्णय पुढील राजकीय दिशा ठरवू शकतो.