हौसे - नवसे - गवसे पाहतात आमदारकीची स्वप्न

सचिन मोरे : 

महाराष्ट्रामध्ये सध्या विधानसभेच्या निवडणुकीचे वारे वाहू लागले आहे. त्यामुळे विविध विधानसभा मतदारसंघांमध्ये इच्छुक उमेदवारांनी आपली मोर्चे बांधणी सुरू केली आहे. अनुसूचित जाती करिता राखीव असणाऱ्या फलटण - कोरेगाव विधानसभा मतदारसंघांमध्ये हौसे - नवसे - गवसे हे आमदारकीची स्वप्न पाहत असल्याने फलटण - कोरेगाव विधानसभा मतदारसंघातील मतदारांचे मोठे मनोरंजन होऊ लागले आहे.

अनुसूचित जाती करिता राखीव असणारा मतदार संघ म्हणजे कोणीही या आणि टिकली मारून जा असंच काहीच प्रकार महाराष्ट्रामध्ये दिसू लागला आहे. "उपऱ्या" उमेदवारांनी येऊन राखीव मतदारसंघांमध्ये स्वतःला अनुसूचित जातीचा म्हणून मला संधी द्या असा प्रकार यापूर्वीच फलटण विधानसभेच्या निवडणूकीत पहायला मिळाला आहे. मात्र अशा उमेदवारांना मतदारांनी त्यांची जागा दाखवली आहे.

२००९ पासून फलटण - कोरेगाव विधानसभा मतदारसंघ अनुसूचित जातीकरिता राखीव झाल्यापासून अनेकांनी या मतदार संघातून आपले नशीब आजमावण्याचा प्रयत्न केला आहे. मात्र मतदारांनी भूमिपुत्राला नेहमीच साथ देत हजारो मते दिली आहेत. सामाजिक त्याचबरोबर राजकीय क्षेत्रातील कोणत्याही प्रकारचे योगदान नसणारे हौसे,नवसे,गवसे या मतदारसंघांमध्ये आपणच आमदार होणार असल्याच्या टिमक्या वाजवत फिरत आहेत.

यापूर्वी 2009,2014 व 2019 या सालामध्ये अनेक स्वयंघोषित आमदारांनी या मतदारसंघाचा अनुभव घेतला आहे. अनेकांनी आर्थिक प्रलोभन देत मतदातरांना आपलेसे करण्याचा प्रयत्न केला. तर अनेकांनी "उसनी इमेज" वापरून प्रभाव पाडण्याचा प्रयत्न केला. 2009 च्या विधानसभा निवडणूकित 21, 2014 च्या विधानसभा निवडणूकित 15 तर 2019 चा विधानसभा निवडणूकित 12 उमेदवारांनी आपले नशीब अजमावले. यापैकी बहुतांशी आयात व आयत्या वेळी निवडणुकीत लढणारे उमेदवार पुन्हा मतदार संघात दिसले सुद्धा नाहीत.

काहींनी मतदार संघात विकासाच झाला नसल्याचा जावई शोध लावला आहे. तर चरितार्थासाठी केलेले काम म्हणजे समाजसेवा केल्याचा अविर्भाव आणणारे व माझे व्यक्तिमत्व उठून दिसते हे मोजमाप विधानसभेसाठी लावून फिरणारे तरुण तुर्क व असेच काही कॉमेडीयन नेते ही सध्या भलत्याच हवेत दिसत आहेत. प्रत्यक्षात निवडणूक आखाडा लवकरच सुरु होईल त्यावेळी खरी कसोटी लागणार आहे. मात्र निवडणूक लढविण्याचा अधिकार संविधानाने सर्वाना दिला आहे हेही तितकेच खरे.

फलटण - कोरगाव विधानसभा मतदारसंघ.. विशेष वार्तापत्र लवकरच...