कराड नगरपालिकेतर्फे भव्य वृक्ष संवर्धन स्पर्धेचे आयोजन

कराड : कराड नगरपालिकेच्या वतीने माझी वसुंधरा अभियान 2022 व स्वच्छ सर्वेक्षण 2022 अंतर्गत सामाजिक संस्था व वैयक्तिक नागरिकांसाठी भव्य वृक्षसंवर्धन स्पर्धेचे आयोजन करण्यात आले आहे. या स्पर्धेचा कालावधी दि. 15 नोव्हेंबर ते 5 मे 2022 पर्यंत असणार आहे.
सामाजिक संस्थासाठीच्या स्पर्धेत प्रथम क्रमांकाठी १० हजार, द्वितीय क्रमांकासाठी ५ हजार व तृतीय क्रमांकासाठी ३ हजार, तसेच झाड, प्रमाणपत्र व मेडल आणि १ हजारांची २ उत्तेजनार्थ बक्षिसे देण्यात येणार आहे. त्यामुळे या स्पर्धेत उत्स्फुर्तपणे सहभाग नोंदवावा, असे आवाहन नगरपालिकेकडून करण्यात आले आहे.
वृक्षसंवर्धन स्पर्धेमध्ये सामाजिक संस्थांना सहभागी होण्यासाठी, अटी व शर्ती घालण्यात आल्या आहेत. त्यामध्ये झाड लावलेल्या जागेची जागा निश्चिती करण्यासाठी झाड लावण्यापूर्वीचे चार फोटो, खड्डे खोदताना व त्यानंतरचे फोटो, झाड लावताना चिंच, आंबा, पिंपळ, वड, लिंब, जांभूळ आदी. देशी झाडांची निवड करावी, झाड लावताना स्पर्धकाचा फोटो व पाटी आवश्यक, पाटीवर स्पर्धकाचे नाव, मोबाईल नंबर व झाड लावण्याचा दिनांक याचा उल्लेख करावा, कमित कमी दहा झाडे लावणे आवश्‍यक, झाडांची उंची चार ते पाच फूट असावी आदींचा समावेश आहे.
तसेच या स्पर्धेसाठी वृक्ष लागवड वाढवण्यासाठी लोकजागृती कार्यक्रमाची संख्या 10 मार्क, वृक्षतोड थांबवण्यासाठी लोकजागृती कार्यक्रमांची संख्या 10 मार्क, वृक्ष लागवड केलेल्या देशी प्रजातीच्या वृक्षांची संख्या 10 मार्क, जुन्या झाडांचे संगोपन व संरक्षणासाठी केलेल्या उपाययोजना 10 मार्क, नवीन लागवड केलेल्या वृक्ष संगोपनासाठीच्या उपाययोजना 10 मार्क, वृक्ष संगोपनासाठी सदस्यांनी घरच्या घरी तयार केलेले कंपोस्ट खत वापरत असल्यास 10 मार्क ( घरी कंपोस्ट खत तयार करीत असल्याबाबत नगरपरिषदेकडे नोंद करणे आवश्यक) असे निकष असणार आहेत.
त्याचबरोबर 1 नोव्हेंबर ते 30 नोव्हेंबर 2021 पर्यंत झाडत लावावे, 5 मे 2022 पर्यंत सर्व्हे करून कोणाचे झाड चांगले वाढले आहे. याची निवड करून बक्षीस वितरण ऑनलाईन पद्धतीने जाहीर केले जाईल, स्पर्धेत भाग घेणाऱ्या सर्व स्पर्धकांना नगरपालिकेमार्फत प्रमाणपत्र दिले जाईल, वृक्षांची लागवड ही कराड शहराच्या हद्दीत असावी, तसेच स्पर्धेत भाग घेण्यासाठी 7499458858, 9175774822 या नंबरवर संपर्क साधावा, असे आवाहन पालिकेकडून करण्यात आले आहे.
तर वैयक्तिक नागरिकांसाठी भव्य वृक्षसंवर्धन स्पर्धेचा कालावधी 15 नोव्हेंबर ते 5 मे 2022 पर्यंत असणार आहे. स्पर्धेत प्रथम क्रमांक 5 हजार, द्वितीय क्रमांक ३ हजार व तृतीय क्रमांक २ हजार तसेच प्रमाणपत्रसह मेडल. तसेच १ हजार रुपयाची उत्तेजनार्थ २ बक्षिसे व प्रमाणपत्र देण्यात येणार आहेत. या स्पर्धेतील अटी व शर्तीमध्ये वरीलप्रमाणेच असणार असून वर दिलेल्या नंबरवरच संपर्क करावा, असे आवाहनही पालिकेतर्फे करण्यात आले आहे.