फलटण शहरातील व तालुक्यातील आरा गिरण्यांच्या तपासणीत वन विभागाचा हलगर्जीपणा

फलटण : शहरातील व तालुक्यातील आरा गिरण्यांच्या तपासणीत फलटण वन विभागाचा हलगर्जीपणा होत असल्याचा आरोप नागरिकांकडून होत असून शहरात व तालुक्यात अवैध लाकूड वाहतूक बोकाळली आहे. दिवस रात्र वृक्षतोड लाकडाची वाहतूक व विक्री सुरू आहे. वृक्षतोड व लाकूड वाहतुकीचा परवाना नसतानाही अनेक गिरणीसमोर गाड्यांची ये-जा होत आहे. 

 अवैध वृक्षतोडीला व वाहतूक तसेच विक्री याला आळा घालण्यासाठी वन विभागाने नियमावली तयार केली आहे. या कामासाठी स्वतंत्र यंत्रणा कार्यरत आहे. दरमहा प्रत्येक आरा गिरणीचे रजिस्टर तपासून वृक्षतोडीसाठी परवानगी असल्याची शहानिशा करणे अपेक्षित आहे. वृक्षतोड परवानगी ते वाहतूक परवानगीसाठी अधिकारी नियुक्त आहेत. मात्र, प्रत्यक्षात तालुक्यात व शहरात अवैध वृक्षतोड वाहतूक व विक्री वाढली आहे. बाहेरील तालुका मधून मोठ्या प्रमाणात लाकडाच्या आयात फलटण तालुक्यात होत असून ही सर्व लाकडांची आयात विनापरवाना बेकायदेशीरपणे होत आहे.

कारवाईची भीती नसल्याने लाकूड माफियांनी दिवस रात्र लाकडांची वाहतूक सुरू केली आहे. शहरात शेकडो वाहनांद्वारे शहरात लाकूड आणले जाते व त्याची विल्हेवाट लावली जात आहे. तालुक्यातील व शहरातील सर्व आरा गिरण्यात (सॉ मिल्स) सर्वाधिक वाहनांची ये-जा सुरू असते. ट्रॅक्टर किंवा ट्रकमध्ये ताडपत्रीखाली झाकून लाकूड आरा गिरणीत विक्रीसाठी आणतात. हा प्रकार मागील अनेक दिवसांपासून सुरू असून फलटण वन अधिकाऱ्यांनी सर्रास डोळेझाक केली आहे. 

बाभूळ, निलगिरी, गुलमोहर, बांबू या प्रजातीचे झाड तोडण्यासाठी परवानगीची गरज नाही. पण, आंबा, कडूनिंब, पिंपळ, साग, चंदन अशा महत्त्वाच्या झाडांसाठी परवानगी आवश्यक आहे. शेतकऱ्याच्या मालकीचे बांधावरील झाड तोडण्यासाठी तहसीलदार किंवा समकक्ष महसूल अधिकारी परवानगी देतात. वनक्षेत्रातील झाड तोडण्यासाठी वन अधिकाऱ्यांची परवानगी गरजेची आहे. मात्र, नियमाचे सर्रास उल्लंघन करून वृक्षतोड जोरात सुरू आहे. वाहतुकीचा परवाना नसताना शेकडो वाहनातून लाकडांची वाहतूक होते.शहर व तालुक्यातील परिसरातील नाक्यावर संबंधित वाहनांची तपासणी बंधनकारक आहे. पण, फलटण वन विभागाचे फिरते पथक क्वचितच वाहनांची तपासणी करते. शहरात अथवा तालुक्यांत कुठेही वन विभागाचे जाणीवूर्वक चेक पोस्ट नाही. 

फलटण वन विभागाचे फिरते पथक फिरतेच 

अतिक्रमण आणि अवैध वृक्षतोड रोखण्यासाठी फलटण वन विभागाचे स्वतंत्र फिरते पथक आहे. तत्परतेने कारवाई करण्यासाठी वन विभागाकडे मोबाईल व्हॅन दाखल झाल्या. प्रत्यक्षात काही व्हॅन वन विभागाच्या कार्यालयात उभ्या आहेत. फिरत्या पथकाचे काम कागदावर उरले आहे. मोबाईल व्हॅन अनेकदा खाजगी कामांना वापरले जात असल्याने फिरती पथक फिरतेच राहत आहे. 

वरिष्ठ जिल्हा वन अधिकारी यांनी ऑन कॅमेरा तपासणी करण्याची आवश्यकता 

फलटण शहरातील व तालुक्यातील आरा गिरणीत खरेदी केलेल्या लाकडाची नोंद असते. झाडाची जागा, झाडाची प्रजात, शासकीय अधिकाऱ्याची परवानगी, वाहतूक परवाना यांची नोंद करणे बंधनकारक आहे. फलटण वन अधिकारी नोंद तपासत नसल्यामुळे गिरण्यात नोंद नसते. प्रत्यक्षात खरेदी विक्री व त्या ठिकाणी असणारा उपलब्ध लाकूड साठा यामध्ये तफावत असतानाही तपासणी करताना कुठेही याचा उल्लेख न करता सर्व अलबेल असल्याचे दाखवले जाते. त्यामुळे लाकडू कुठून आणले याचा उलगडा होत नाही. वन विभागाच्या वरिष्ठ अधिकाऱ्यांनी शहरातील व तालुक्यातील आरा गिरण्यांची ऑन कॅमेरा तपासणी करण्याची आवश्यकता असून मागील अनेक वर्षापासून चाललेला लाकडांचा काळाबाजार या तपासणी मधून पुढे येऊ शकतो. कोट्यावधींची लाकूड खरेदी व विक्री व्यवहार व त्यातून शासनाचा बुडलेला महसूल यास जबाबदार कोण हेही या तपासातून स्पष्ट होऊ शकते.