शासकीय ग्रंथालयात ‘ग्रंथ प्रदर्शन’ आणि ‘आनंददायी वाचन’ या कार्यक्रमांनी ‘वाचन प्रेरणा दिन’ साजरा

जिल्हा ग्रंथालय अधिकारी कार्यालय, सातारा व श्री शिवछत्रपती वाचनालय, सातारा यांचे वतीने राष्ट्रभक्तीपर पुस्तकांचे ‘ग्रंथ प्रदर्शन’ आणि ‘आनंददायी वाचन’ या विषयावर व्याख्यान आयोजित करण्यात आले होते या कार्यक्रमांनी ‘वाचन प्रेरणा दिन’ साजरा करण्यात आला.

या कार्यक्रमाचे प्रमुख वक्ते शिवाजी राऊत, अध्यक्षस्थानी जिल्हा व्यवसाय शिक्षण व प्रशिक्षण अधिकारी, सचिन धुमाळ होते तर श्री शिवछत्रपती वाचनालयाचे अध्यक्ष शाहूराज फाळके, जिल्हा ग्रंथालय अधिकारी अमित सोनवणे व श्रीमंत छत्रपती प्रतापसिंह (थोरले महाराज) नगर वाचनालयाचे कार्यवाह वैदेही कुलकर्णी इत्यादी मान्यवर उपस्थित होते.

आत्मविश्वास आणि समस्यांचा उकल करण्याची क्षमता ही वाचनातून प्राप्त होते. वाचन हे जीवन यशाचे साधन आहे. वाचन ही सभ्यता आहे. वाचन ही संस्कृतीचा विकास आहे. ते सर्वांचे साध्य आहे. सर्वच प्रश्नांना भिडन्यासाठी वाचनच नितांत गरजेच असून त्यातून जीवन आनंद मिळतो आहे. त्यासाठी युवकांनी वाचन संस्कृतीचा ध्यास घेतला पाहिजे, असे विचार ‘आनंददायी वाचन’ या विषयावर प्रमुख व्याख्याते म्हणून शिवाजी राऊत यांनी व्यक्त केले.

जिल्हा ग्रंथालय अधिकारी अमित सोनवणे यांनी प्रास्ताविक करताना राज्य शासनाने माजी राष्ट्रपती डॉ. अब्दुल कलाम यांची स्मृती केवळ अभिवादनाने जतन न करता ती वाचन संस्कृतीच्या प्रेरणेचा दिवस म्हणून 2015 पासून ‘वाचन प्रेरणा दिन’ साजरा केला जातो. “अमृत महोत्सव भारतीय स्वातंत्र्याचा, उत्सव राष्ट्रभक्तीपर पुस्तकांच्या वाचनाचा” ही या वर्षीच्या वाचन प्रेरणा दिनाची मध्यवर्ती संकल्पना असल्याचे त्यांनी सांगितले. समाजातील सर्वच स्तरातील लोकांनी आपल्या जीवनातील ज्ञानाचे महत्त्व ओळखून वाचनाचा छंद जोपासला पाहिजे, असेही अमित सोनवणे यांनी सांगितले. वाचन प्रेरणा दिनी आयोजित केलेल्या विविध कार्यक्रमांतून प्रेरणा घेवून वाचकांनी स्वत: मधील वाचन सवय विकसित करावी. त्यातूनच जीवन अधिक आनंदमय व सुखकर होण्यास मदत होईल, असे त्यांनी सांगितले.

या कार्यक्रमास शासकीय औद्योगिक प्रशिक्षण संस्था, सातारा येथील विद्यार्थी व शिक्षक आणि श्री शिवछत्रपती वाचनालयाचे राजाभाऊ जाधव, चंद्रकांत चव्हाण इत्यादी पदाधिकारी व वाचक वर्ग उपस्थित होता.