ज्ञान आणि कौशल्याचा समाजाच्या उद्धारासाठी उपयोग करा

कराड : उच्च शिक्षण आणि पदवी प्राप्त केल्यांनतर बहुतांशी जणांचा प्रोफेशनल करिअरकडे ओढा असतो. परंतु, त्याआधी युवा पिढीने आपल्या उमेदीच्या काळात ज्ञानाचा आणि कौशल्याचा समाजाच्या विकासासाठी व उद्धारासाठी उपयोग करावा. आरोग्याच्या क्षेत्रात काम करत असताना केवळ पैसा ही प्रेरणा न ठेवता समाजाची सेवा आणि ज्ञान प्रेरणास्थानी ठेवावे, असे प्रतिपादन माजी मुख्यमंत्री, राज्याचे विरोधी पक्षनेते ना. देवेंद्र फडणवीस यांनी केले.
येथील कृष्णा वैद्यकीय विज्ञान अभिमत विद्यापीठाचा रविवारी ५ रोजी १० वा दीक्षांत समारंभ संपन्न झाला. याप्रसंगी प्रमुख पाहुणे म्हणून ते बोलत होते. अध्यक्षस्थानी कृष्णा अभिमत विद्यापीठाचे कुलपती डॉ. सुरेश भोसले होते. यावेळी केंद्रीय अर्थ राज्यमंत्री डॉ. भागवत कराड, कुलपतींचे प्रधान सल्लागार वेदप्रकाश मिश्रा, प्र-कुलपती डॉ. प्रवीण शिनगारे, कुलगुरु डॉ. नीलम मिश्रा, डॉ. अतुल भोसले, कर्नाटकचे उद्योगमंत्री ना. मुरुगेश निराणी, केंद्रीय आरोग्य राज्यमंत्री डॉ. भारती पवार यांचे सहाय्यक ओमप्रकाश शेटे, परीक्षा नियंत्रक डॉ.आर.के. गावकर, कुलसचिव डॉ.एम.व्ही. घोरपडे, व्यवस्थापन मंडळाचे सदस्य विनायक भोसले, डॉ. सुप्रिया पाटील, डॉ.टी.पू. विष्णूदेवी, स्नेहल मसूरकर, मनिषा मेघे, दिलीप पाटील, पी.डी. जॉन, डॉ. सबिता राम, डॉ. अक्षता कोपर्डे, डॉ. ज्योती साळुंखे, डॉ. रेणुका पवार, डॉ. स्वप्ना शेडगे, संशोधन संचालक डॉ. अरुण रिसबूड, अतिरिक्त संशोधन संचालक डॉ.डी.के. अगरवाल, कृष्णा हॉस्पिटलचे वैद्यकीय संचालक डॉ.ए.वाय. क्षीरसागर, मेडिकल ॲड. मिनिस्ट्रेटर डॉ.आर.जी. नानिवडेकर, अधिष्ठाता डॉ.एस.टी. मोहिते, डॉ. एन.डी. शशिकिरण, डॉ. वैशाली मोहिते, डॉ.एस्.सी. काळे, डॉ.जी. वरदराजुलू, डॉ.एस.आर. पाटील आदी. मान्यवरांची प्रमुख उपस्थिती होती.
ना. देवेंद्र फडणवीस म्हणाले, कृष्णा अभिमत विद्यापीठातून आज डॉक्टरची पदवी घेऊन अनेक विद्यार्थी बाहेर पडणार आहेत. त्यांनी आपण ज्या गावातून, समाजातून आलो; त्या गावाचे, समाजाचे काहीतरी देणे लागतो याचा विसर पडू देता कामा नये. स्पर्धात्मक युगात वावरत एकट्याची प्रगती साधताना आपल्या  समाजातील एखादा वर्ग पाठीमागे राहिल्यास आपल्या पुढे जाण्यालाही काही अर्थ उरत नाही, हेही सर्वांनी लक्षात घेतले पाहिजे, असेही त्यांनी यावेळी सांगितले.
ते पुढे म्हणाले, इथून बाहेर पडताना प्रत्येकांने भारतीय संविधानाने आपल्याला दिलेली समानता आणि त्यावर आधारित समाजरचना अस्तित्वात आणण्यासाठी आपापल्या परीने योगदान दिले पाहिजे. परीक्षा येतात जातात, अनेक मेडलही मिळतात. परंतु, आपण केलेले चांगले कामच आपल्याला मोठे समाधान मिळवून देते; हेही विद्यार्थ्यांनी लक्षात घेणे आवश्यक आहे. पंतप्रधान नरेंद्र मोदी यांच्या नेतृत्वाखाली देशात आरोग्य व्यवस्थेच्या सुधारणेवर भर देण्यात येत आहे. देशातील अडीच लाख प्राथमिक केंद्रांना विस्तारित करण्याची सरकारची योजना आहे. त्यामुळे येत्या काळात सुमारे २ लाख १३ हजार कोटींची गुंतवणूक आरोग्य क्षेत्रात होणार आहे. प्रत्येकाने काही वर्ष ग्रामीण भागातील लोकांची सेवा करून त्यांच्या आरोग्यासाठी आपल्या ज्ञानाचा आणि कौशल्याचा उपयोग केल्यास मोठे आत्मिक समाधान मिळेल. हे समाधानातून मिळालेली पदवी हीच आपली खरी पदवी असते, असेही मत त्यांनी यावेळी व्यक्त केले.  
ना. डॉ. भागवत कराड म्हणाले, कृष्णा विद्यापीठाला डॉ. सुरेश भोसले यांच्यासारखे नेतृत्व लाभल्यामुळे या विद्यापीठाने वैद्यकीय क्षेत्रात उच्च दर्जा आणि गुणवत्ता सिद्ध केली आहे. कोरोना लसींच्या चाचण्यांमध्ये या विद्यापीठाने दिलेले योगदान देशासाठी महत्त्वपूर्ण ठरले आहे. याकामी श्री विठ्ठल रुक्मिणी देवस्थान समितीचे माजी अध्यक्ष डॉ. अतुल भोसले यांचे या विद्यापीठाला चांगले मार्गदर्शन लाभल्याचेही त्यांनी यावेळी आवर्जून सांगितले.
कुलपती डॉ. सुरेश भोसले म्हणाले, स्वर्गीय जयवंतराव भोसले यांनी १९८२ साली कृष्णा हॉस्पिटल व वैद्यकीय संशोधन केंद्राची स्थापना केली. ही सगळी समृद्धी कृष्णेच्या पाण्यातून आली आहे. त्यामुळे या समूहाने कृष्णा हे नाव धारण केले आहे. कोरोना काळात तब्बल ८ हजार रुग्णांना या संस्थेने कोरोनामुक्त करुन एक विक्रम प्रस्थापित केला. गेल्या चाळीस वर्षात पैसे नाहीत म्हणून या हॉस्पिटलमधून उपचार न घेता पाठीमागे गेला असा एकही रुग्ण नाही. स्वर्गीय आप्पासाहेबांनी घालून दिलेला हा जनसेवेचा आदर्श यापुढेही कायम ठेवणार आहे.
यावेळी विद्यापीठातर्फे कर्नाटक राज्याचे उद्योगमंत्री ना. मुरुगेश निराणी, तसेच केंद्रीय आरोग्य राज्यमंत्री डॉ. भारती पवार यांचे सहाय्यक व मुख्यमंत्री सहाय्यता कक्षाचे माजी प्रमुख ओमप्रकाश शेटे यांना कुलपती डॉ. सुरेश भोसले यांच्या हस्ते डी.लीट. पदवी बहाल करण्यात आली.
या समारंभात मेडिसिन अधिविभाग ४७६, नर्सिंग २९७, दंतविज्ञान १८४, फिजिओथेरपी १२८, अलाईड सायन्स अधिविभाग ८० आणि औषधनिर्माणशास्त्र ६२ अशा सहा अधिविभागातून एमबीबीएस, एमएस, बीडीएस, एमडीएस, बीपीटीएच, एमपीटीएच, बीएस्सी नर्सीग, एमएस्सी नर्सींग, एमएस्सी बायोटेक्नॉलॉजी, एमएस्सी मायक्रोबायोलॉजी, बी फार्मसी आदी अभ्यासक्रमाच्या १२२७ विद्यार्थी-विद्यार्थिनींना पदवी प्रदान करण्यात आली. झाराश्री साहू, किरण निकम, जयवंत थोरात, गितांजली पाटील, डॉ. मनिषा लद्दड, डॉ. गौरी शिंदे, शिवाजी पवार, आनंदी बांडे यांना पीएच.डी. पदवी प्रदान करण्यात आली. विशेष गुणवत्ताप्राप्त विद्यार्थ्याना मान्यवरांच्या हस्ते पारितोषिके प्रदान करुन गौरविण्यात आले.
प्रारंभी कुलगुरु डॉ. निलम मिश्रा यांनी प्रास्ताविक केले. यावेळी कृष्णा मेडिकल कॉलेजच्या नूतनीकरण केलेल्या इमारतीचे, कृष्णा विद्यापीठाच्या ग्रंथालयाचे, फार्मसी व फिजिओथेरपी अधिविभागांच्या सुसज्ज इमारतींचे उद्घाटन मान्यवरांच्या हस्ते फीत कापून करण्यात आले. कार्यक्रमास विभागप्रमुख, प्राध्यापक, विद्यार्थी-विद्यार्थिनी उपस्थित होते.