गणेशोत्सव देखावा सजावट स्पर्धा 2022 साठीप्रवेश अर्ज दि. 31 ऑगस्ट 2022 पासून सुरु

सातारा दि. 17: गेल्या वर्षीप्रमाणे या वर्षीही गणेशोत्सवामध्ये "माझा गणेशोत्सव  माझा  मताधिकार" ही स्पर्धा  आयोजित करण्यात येणार असून या स्पर्धेत घरगुती गणेशोत्सव व सजावटीसोबत सार्वजनिक गणेशोत्सव मंडळांनीही या स्पर्धेत सहभागी  व्हावे,  असे आवाहन उप जिल्हाधिकारी तथा उप जिल्हा  निवडणूक अधिकारी  निता सावंत-शिंदे  यांनी केले आहे.

दरवर्षी गणेश चतुर्थीला महाराष्ट्रातील गणेश भक्तांच्या घरी तसेच सार्वजनिक गणेशोत्सव मंडळामध्ये गणेशाचे आगमन होते आणि वातावरण चैतन्याने भरुन जाते. महाराष्ट्राच्या मुख्य निवडणूक अधिकारी कार्यालयाने "माझा गणेशोत्सव  माझा  मताधिकार" या विषयासंबंधी गणेशोत्सव सजावट – देखावा स्पर्धा  आयोजित केली आहे. स्पर्धेचे हे दुसरे वर्ष असून सार्वजनिक गणेशोत्सव मंडळाबरोबरच वैयक्तिकरित्याही नागरिकांना या स्पर्धेत सहभागी होता येणार आहे.

गणेशोत्सवात सार्वजनिक मंडळे प्रबोधनपर देखावे साकारतात, तसेच घरोघरीही गणेशाची सुंदर आरास केली जाते. सार्वजनिक मंडळाच्या देखाव्यांच्या माध्यमातून आणि घरगुती गणेशोत्सव सजावटीद्वारे सामाजिक संदेशदेखील दिले जातात. या स्पर्धेचा विषय "माझा गणेशोत्सव  माझा  मताधिकार" हा आहे. मताधिकार हा 18 वर्षावरील नागरिकांचा कायदेशीर अधिकार असल्याने प्रत्येक पात्र नागरिकाने आपले नांव मतदार यादीत नोंदविणे आणि मताधिकार बजावणे, मतदार यादीतील दुबार नांवे वगळण्यासाठी मतदार  ओळखपत्राला आधार कार्ड जोडणे, हे सूत्र केंद्रस्थानी ठेवून मंडळांना देखाव्यांच्या माध्यमातून तर घरगुती पातळीवर गणेश मखराची सजावट, गणेश दर्शनासाठी घरी येणा-या भाविकांमध्ये यासंबंधीची जागरुकता करण्यासाठी अभिनव कल्पना राबवता येईल. तसेच मताधिकार बजावताना , जात, धर्म, पंथ निरपेक्ष राहून आपला लोकप्रतिनिधी निवडणे, पैसे किंवा इतर आमिषांना बळी न पडता मताधिकार बजावणे, यांसारख्या विषयांवर आपल्या देखाव्यातून- सजावटीतून जागृती करुन लोकशाही समृध्‍द करता येईल.

गणेशोत्सव देखावा सजावट  स्पर्धा 2022 साठी प्रवेश अर्ज दि. 31  ऑगस्ट 2022 पासून सुरु होणार आहे. स्पर्धेसाठी  दि. 31 ऑगस्ट 2022 ते 9 सप्टेंबर 2022 या काळात आलेले साहित्यच स्पर्धेसाठी  ग्राह्य धरले जाईल.

स्पर्धेची नियमावली

सदर स्पर्धा वैयक्तिक  (घरगुती गणेशोत्सव सजावट) आणि  सार्वजनिक गणेशोत्सव मंडळे  अशा दोन्हीसाठी  असून घरगुती  स्पर्धेत साहित्य पाठविण्यासाठी  मताधिकार, आधार जोडणी, निवडणूक, लोकशाही  या विषयाला अनुसरुन  केलेल्या घरगुती गणेशोत्सव सजावटीचे विविध कोनातून काढलेले पाच फोटो पाठवावेत. प्रत्येक फोटो हा जास्तीत जास्त 5 MB   साईजचा व  JPG फॉरमॅटमध्येच असावा. मताधिकार, आधार जोडणी, निवडणूक, लोकशाही  या विषयाच्या देखाव्याची ध्वनीचित्रफीत ( व्हिडीओ) गुगल अर्जावर जोडावी. ध्वनीचित्रफीत ( व्हिडीओ)  आणि फोटो गुगल अर्जावर जोडताना  त्यावर स्पर्धकाचे नाव येणार नाही याची काळजी घ्यावी. अन्यथा सदर अर्ज स्पर्धेतून बाद केला जाईल. चित्रफितीला  आवाजाची जोड देवू शकता. ध्वनीचित्रफीतीची  ( व्हिडीओची )  साईज जास्तीत जास्त 100 MB असावी. तसेच ही  ध्वनीचित्रफीत mp4  फॉरमॅटमध्ये असावी व ती एक ते दोन मिनीटांची असावी.

सदर स्पर्धेत भाग घेण्यासाठी सार्वजनिक गणेशोत्सव मंडळांनी मताधिकार, आधार जोडणी, निवडणूक, लोकशाही  या विषयाला अनुसरुन  केलेल्या देखाव्याचे विविध कोनातून काढलेले पाच फोटो पाठवावेत. प्रत्येक फोटो हा जास्तीत जास्त 5 MB   साईजचा व  JPG फॉरमॅटमध्येच असावा. गणेशोत्सव मंडळामध्ये केलेल्या  मताधिकार, आधार जोडणी, निवडणूक, लोकशाही  या विषयाच्या देखाव्याची ध्वनीचित्रफीत ( व्हिडीओ) गुगल अर्जावर जोडावी. ध्वनीचित्रफीत ( व्हिडीओ)  आणि फोटो गुगल अर्जावर जोडताना  त्यावर मंडळाचे किंवा मंडळातील कुणा व्यक्तीचे नाव व लोगो येणार नाही याची काळजी घ्यावी. अन्यथा सदर अर्ज स्पर्धेतून बाद केला जाईल. ध्वनीचित्रफीतीची  ( व्हिडीओची )  साईज जास्तीत जास्त 500 MB असावी. तसेच ही  ध्वनीचित्रफीत mp4  फॉरमॅटमध्ये असावी व ती  10 मिनिटांपेक्षा अधिक असू नये. गणेशोत्सव मंडळांनी सदर स्पर्धेत सहभागी होण्यासाठी गुगल अर्जावर स्पर्धक म्हणून गणेशोत्सव मंडळाचे  नाव लिहून त्यानंतर डॅशचे चिन्ह ( - )  देवून अध्यक्ष किंवा सचिव यांचे नांव लिहावे.( उदा. घोलाईदेवी सार्वजनिक गणेशोत्सव मंडळ – मंदार मोरे ) आणि पुढे त्याच व्यक्तीचा पत्ता आणि मोबाईल  क्रमांक लिहावा. गणेशोत्सव मंडळाचे अध्यक्ष किंवा सचिव यांची स्वाक्षरी असलेले पत्र गुगल अर्जावर जोडावे. या पत्राचा नमुना  गुगल अर्जावर उपलब्ध करुन देण्यात आले आहे.

स्पर्धकांनी आपले फोटो आणि ध्वनिचित्रफीत https://forms.gle6j7ifuUA4YSRZ6AU7   या गुगल अर्जावरील माहिती भरुन त्यावर पाठवावेत. ज्या स्पर्धकांना  फोटो किंवा  ध्वनीचित्रफीत पाठवण्यास अडचण येईल , त्यांनी 8669058325 (प्रणव सलगरकर), 9987975553  (तुषार पवार ) या व्हॉटसॲप क्रमांकावर संदेश पाठवून कळवावे.

बक्षिसांचे स्वरुप-

सार्वजनिक गणेशोत्सव मंडळासाठी   बक्षिसांचे स्वरुप प्रथम क्रमांक 51,000/-, व्दितीय क्रमांक 21,000/-, तृतीय क्रमांक 11,000/-  असून उत्तेजनार्थ  5,000/- रुपयांची  एकूण दहा बक्षिसे असणार आहेत.

घरगुती गणेशोत्सव सजावटीसाठी  बक्षिसाचे स्वरुप प्रथम क्रमांक 11,000/-, व्दितीय क्रमांक 7,000/-, तृतीय क्रमांक 5,000/-  असून उत्तेजनार्थ  1,000/- रुपयांची  एकूण दहा बक्षिसे असणार आहेत.

 सहभागी  सर्व  स्पर्धकांना  मुख्य निवडणूक अधिकारी कार्यालयातर्फे प्रमाणपत्र देण्यात येईल. आलेल्या देखाव्या सजावटीमधून सर्वोत्तम देखावे सजावटी निवडण्याचा तसेच स्पर्धेच्या नियमांमध्ये बदल करण्याचा अंतिम निर्णय परीक्षक आणि आयोजक यांच्याकडे राहील. स्पर्धकाने पाठविलेल्या साहित्यावर अन्य कुणी  स्वामित्व हक्क सांगितल्यास त्याची पडताळणी करण्याची जबाबदारी सदर स्पर्धकाची राहील.  निवडणूक कार्यालयात कार्यरत कर्मचारी/अधिकारी स्पर्धेत सहभागी होवू शकतात. मात्र त्यांच्या साहित्याचा बक्षिसासाठी विचार केला जाणार नाही स्पर्धेतील उत्कृष्ट साहित्य मुख्य निवडणूक अधिकारी कार्यालयाच्या समाजमाध्यमांवर प्रसारित केले जाईल. स्पर्धेची अधिक माहिती  मुख्य निवडणूक अधिकारी कार्यालयाच्या संकेतस्थळावर  https://ceo.maharashtra.gov.in/  उपलब्ध असल्याची माहिती  उपजिल्हाधिकारी व उपजिल्हा निवडणूक अधिकारी निता सावंत-शिंदे यांनी दिली.